HomePolitikWirtschaftTourismusBildung/SozialesKulturSportBlaulichtGesundheitNatur/Umwelt

Corina Mengiardi e Paul Renn s’ingaschan daspö blers ons per La Terrassa e per La Palma a Scuol (fotografia: Nicolo Bass).

Corina Mengiardi e Paul Renn s’ingaschan daspö blers ons per La Terrassa e per La Palma a Scuol (fotografia: Nicolo Bass).

«Restar flexibels e tscherchar soluziuns»

Corina Mengiardi e Paul Renn mainan fingià blers ons il restorant La Terrassa sül Stradun a Scuol e La Palma i'l territori da skis Motta Naluns. Els han passantà fingià differentas crisas, ma amo ingüna sco la pandemia dal coronavirus. Lur recept es: tscherchar soluziuns e na rögnar.

Daspö il 1987 respectivamaing il 1991 maina Paul Renn il restorant La Terrassa sül Stradun a Scuol e La Palma i’l territori da skis Motta Naluns. Dal 1997 es gnüda pro eir sia partenaria da vita Corina Mengiardi. Els duos as cumplettan idealmaing e s’ingaschan di e not per la sporta per giasts ed indigens ed impustüt per la giuventüna. Insembel hana passantà differentas crisas, d’invierns inters sainza naiv fin pro la deblezza da l’euro. Però alch simil sco la pandemia dal coronavirus nun ha neir il pêr d’usters mai passantà. «Tuot es intschert ed ingün nu sa ingio cha la situaziun va a finir», quintan Corina Mengiardi e Paul Renn. Ed ad els nu resta oter co d’acceptar mincha jada las nouvas decisiuns da la Regenza grischuna o dal Cussagl federal. Minchatant fana bainschi il puogn in gialoffa, ma adüna sainza rögnar. Lur devisa es da restar flexibels e da s’adattar mincha jada a la nouva situaziun e da chattar soluzins. «L’associaziun Gastro Suisse s’ingascha per noss drets e nus ans pudain concentrar sülla lavur», disch Corina Mengiardi. Ella es respunsabla per tuot l’administraziun e s’ingascha ferm per s’infuormar e restar actuala a reguard pretaisas e drets. Ed adüna darcheu esa d’implir oura formulars ed inoltrar dumondas per tgnair suot controlla la situaziun finanziala.

Fingià l’on passà han Corina Mengiardi e Paul Renn reagi subit e s-chaffi cun La Terrassa sco ün dals prüms restorants la sporta da Take Away. «Nus vain realisà üna gruppa da WhatsApp pels cliaints fidels ed uschè vaina pudü infuormar mincha di che chi’d es il menü ed ils claints pudaivan postar ed indichar l’urari cur chi vegnan per davo», quintan ils usters da La Terrassa. Eir i’l territori da skis spordschan els Take Away pro La Palma. «Uossa cha’ls claints pon sezzer dadoura in quatter vi d’üna maisa funcziun quai fich bain», disch Paul Renn. Els acceptan la situaziun e las decisiuns e prouvan da far il meglder. «Nus badain eir grond sustegn da la cliantella indigena e d’utrò», agiundscha Corina Mengiardi. Quista solidarità inscuntra ella mincha di ed in mincha situaziun. «A nus stan ils cliaints eir ferm a cour», disch’la. Cha per exaimpel hajan els sport il menü per Take Away per cha’ls blers lavuraints in cumün survegnan insomma ün giantar e na per guadognar blers raps. Cha cun quist servezzan ragiundschna raduond 20 petschient dal schmertsch d’üna stagiun normala. «Per furtüna vaina lavurà la stà e l’utuon passà extrem bain ed a la fin giaraja sü tant inavant», disch Mengiardi cun bler optimissem. «Ed eir uossa giaraja in qualche möd inavant», agiundscha Paul Renn. Cha il plü important saja per els da chattar bunas soluziuns pels lavuraints. Cha per tscherts impiegats hana pudü annunzchar lavur cuorta, e tscherts sajan annunzchats pro l’intermediaziun da lavur chantunala RAV. E scha qualchosa resta finalmaing, schi survgnaran eir ils duos patruns üna paja. Els chi portan tuot il ris-ch e stan bun culla facultà privata. «Nos affar es nossa pensiun», disch Paul Renn, chi accumplischa bainbod il sesantavel anniversari. E cha perquai pondereschan els bain mincha pass e mincha ris-ch. Per exaimpel hana calculà bain d’utuon avant co implir ils schlers ed els han trat a nüz lur grond’experienza. Natüralmaing suna cuntaints, cha l’agüd gnia uossa plü svelt e sainza impedimaints. Ma il plü gugent vessna bain da pudair lavurar, da pudair servir ed esser in contact cun lur blers giasts fidels. 

Text: Nicolo Bass


Noch keine Kommentare

1000/1000
  • RECEPTIONIST/IN
  • GEWERBERÄUME – St. Moritz-Dorf
  • Bares für Rares
  • Reinigungskraft (30 %)
  • Vitali
  • Monopol für Engadiner
  • Betriebsleiter (m/w)
  • BAG – Coronavirus
  • BAG – Coronavirus
  • Custodi/-a per las immobiglias da scoula culla sela polivalenta per 100 %Vschinauncha da Segl