Raduond 150 persunas han visità in lündeschdi saira la radunanza cumünala da Scuol. Per la plü gronda tensiun ha pisserà la prüma dumonda da credit, nempe ün credit da planisaziun dad 1,2 milliuns francs pel proget «Avegnir Infra Scuol». Quist credit vain dovrà per elavurar ils preprogets per adattar e sviluppar inavant la sporta turistica süls areals da Trü, dal Bogn Engiadina Scuol (BES) e da Gurlaina. Per exaimpel dess gnir modernisà il BES e cumplettà cun ün bogn da famiglia. Pel areal da Trü dessan gnir scleridas las variantas per sanar il bogn avert o per rimplazzar quel per exaimpel cun ün lai da bognar. Implü dess gnir approfundida l’idea da la «Chasa Trü» cun üna sporta indor cun restoraziun. Tant pel svilup da Trü sco eir dal BES sun previsas concurrenzas d’architectura correspundentas. Pro l’areal da Gurlaina es intant previs da realisar ün plan directiv (Masterplan) per tuot la sporta da sport. Implü cumpiglia il credit eir üna proposta pel proceder da realisaziun ed ün concept da finanziaziun. La gruppa da lavur correspundenta ha preparà ed analisà plüssas variantas süls differents areals turistics. Dürant ils ultims duos ons han gnü lö differents lavuratoris e duos sairadas d’orientaziun. In lündeschdi saira ha Niculin Meyer, promotur d’economia dal cumün da Scuol e commember da la gruppa da lavur preschantà las ideas. Finalmaing es gnü acceptà il credit da planisaziun sainza discussiun e cun be üna cuntravusch. 

Desch dumondas da credit

Il credit da planisaziun a reguard il proget «Avegnir Infra Scuol» nun es stat l’unic credit chi’d es gnü deliberà in lündeschdi saira a Scuol. Las preschaintas ed ils preschaints han acceptà in tuot desch credits per investiziuns chi surpassan 200 000 francs. Per exaimpel 450 000 francs per rimplazzar la Punt Veidra ad Ardez; 1,5 milliuns francs per sanar il clucher da la beselgia da Sent; 1,15 milliuns francs per l’access da Sotruinas cun ün surpassagi pella loipa; 1,2 milliuns francs per inscenar las funtanas d’aua minerala e 240 000 francs per ün concept da signalisaziun e manisaziun turistica. Differents da quists progets vegnan realisats in plüssas etappas. Fingià in october d’eira gnü deliberà ün credit da planisaziun da 500 000 francs per proseguir cul proget «Scoula Scuol+». Las investiziuns nettas dal cumün da Scuol per l’on 2023 importan 13,4 milliuns francs. Sco cha’l capo cumünal Christian Fanzun ha infuormà in radunanza, pertocca bundant ün terz da quist import, investiziuns chi d’eiran fingià previssas e budgetadas dal 2022 e chi nu sun finalmaing gnüdas realisadas. Uschè cha las investiziuns effectivas per l’on 2023 as cunfan culla media d’investiziuns annualas dal cumün da Scuol da bundant ot milliuns francs. 

Aigna finanziaziun da 27 pertschient

Il preventiv da gestiun 2023 prevezza pro entradas da raduond 57,5 milliuns e sortidas da 56,3 milliuns francs ün guadogn dad 1,2 milliuns francs. Il cumün da Scuol prevezza da far l’on chi vain amortisaziuns da raduond 3,6 milliuns francs, l’aigna finanziun previsa importa eir 3,6 milliuns francs (ca. 27 pertschient). Las votantas ed ils votants preschaints in radunanza han acceptà il preventiv 2023 sainza cuntravuschs. Implü es gnü fixà il pè d’impostas per l’on 2023 sün 100 pertschient da l’imposta chantunala simpla. Eir las taxas d’aua, da chanalisaziun e sarinera sco eir pellas immundizchas restan sco ils ultims ons. Ultra da quai esa gnü decis da tgnair la quota per la vendita d’immobiglias a persunas cun naziunalità estras sün 100 pertschient. 

In seguit a la preschantaziun dal preventiv 2023 sun las preschaintas ed ils preschaints gnüts orientats da Heinz Gross, commember da la direcziun da las Ouvras Electricas d’Engiadina (OEE) a reguard l’idea d’ün parc fotovoltaic Sur Bos-cha, suot il Piz Champatsch. Tenor il perit da las OEE exita a Sur Bos-cha sper il territori da skis da Motta Naluns ün potenzial per prodüer forza solara da tanter 80 fin 120 gigawatt-uras. Sco cha’l capo cumünal Christian Fanzun ha agiunt in radunanza han fingià plüs partenaris potenzials muossà interess per ün tal proget. Causa cha la nouva ledscha d’energia pretenda ün agir speditiv, cuntinuan las discussiuns e trattativas amo avant Nadal.

 Per Christian Fanzun es la radunanza da preventiv in lündeschdi saira statta l’ultima radunanza cumünala sco capo cumünal. El es gnü onurà a la fin da la radunanza per tuot sia lavur politica ed impustüt eir per seis ingaschamaint dürant ils ultims ot ons sco prüm capo cumünal dal cumün da Scuol fusiunà. 

Text: Nicolo Bass