Vschinauncha da Silvaplauna – Comunicaziun da la decisiun d’appruvaziun davart la planisaziun locala

Culla decisiun nr. 831 ed applichand l’art. 49 da la Ledscha davart la planisaziun dal territori pel chantun Grischun (LPTGR) ho la Regenza dal chantun Grischun appruvo als 25 november 2025 la revisiun parziela da la planisaziun locala «Foppas ost», decisa a la radunanza cumünela dals 23 november 2023. 
La revisiun parziela da la ledscha da fabrica (art. 21a ed art. 106) dals 23 november 2023 es gnida appruveda sainza arsalvs, cundiziuns e prescripziuns.

Il plaun da zonas 1:500 Foppas dals 23 november 2023 es gnieu appruvo i’l sen da las consideraziuns culla seguainta indicaziun:
a)    La vschinauncha vain rendida attenta da contacter il Servezzan archeologic dal Grischun düraunt la procedura da permiss da fabrica per planiser eventuelas examinaziuns prelimineras.

Il plaun generel da furmaziun 1:500 Foppas dals 23 november 2023 es gnieu appruvo i’l sen da las consideraziuns culla seguainta correctura directa tenor l’art. 49 al. 3 da la Ledscha davart la planisaziun dal territori pel chantun Grischun (LPTGR) e culla seguainta cundiziun:
a)    Il rinviamaint a l’art. 24b da la ledscha da fabrica da la vschinauncha da Silvaplauna (BauG) illa legenda dal plaun vain rimplazzo tres ün rinviamaint a l’art. 21a dal BauG.
b)    Per garantir üna buna concepziun tenor l’art. 73 LPTGR i’l ram da las proceduras consecutivas da l’elavuraziun dal proget da fabrica, es da consulter üna cussagliaziun concepziunela.

Il plaun generel d’access «Trafic» 1:500 Foppas dals 23 november 2023 es gnieu appruvo i’l sen da las consideraziuns culla seguainta correctura directa tenor l’art. 49 al. 3 da la Ledscha davart la planisaziun dal territori pel chantun Grischun (LPTGR):
a)    Il rinviamaint a l’art. 24b da la ledscha da fabrica da la vschinauncha da Silvaplauna (BauG) illa legenda dal plaun vain rimplazzo tres ün rinviamaint a l’art. 21a dal BauG.

Il plaun generel d’access «Trafic» 1:2000 Via da colliaziun chantunela dals 23 november 2023 es gnieu appruvo i’l sen da las consideraziuns culla seguainta indicaziun:
a)    La vschinauncha vain rendida attenta cha’l proget da fabrica ho da gnir d’inoltro adura aunz la dumanda da fabrica a l’uffizi da construcziun bassa dal Grischun per ün’examinaziun preliminera.
b)    A vain arcumando a la vschinauncha da consulter üna planisaziun specialiseda per planiser ils aspets tecnics.

Las prescripziuns da fabrica specielas «Zona d’abiter e d’hotels Foppas» dals 23 november 2023 sun gnidas appruvedas sainza arsalvs, cundiziuns e prescripziuns.
Ils mezs da planisaziun appruvos e la decisiun cumpletta da la Regenza sun exposts ad invista publica ill’administraziun cumünela düraunt las solitas uras d’avertüra dal fnestrigl. Cunter arsalvs, cundiziuns e prescripziuns in merit po gnir recurrieu infra 30 dis daspö la publicaziun – confuorm a la ledscha davart la giurisdicziun administrativa (LGA) – tal Tribunel superiur dal chantun Grischun, Grabenstrasse 30, 7001 Cuira.

IN NOM DA LA SUPRASTANZA CUMÜNELA:
il president cumünel: Daniel Bosshard
la chanzlista cumünela: Franzisca Giovanoli 

Silvaplauna, ils 1. december 2025