Reto Rauch es stat il sinonim per la revoluziun politica ed il grond müdamaint. Aita Zanetti invezza, sco vice-presidenta actuala, ha stuvü surtour las ultimas eivnas la cuolpa per tuot ils sbagls da la suprastanza, da la direcziun e dal capo cumünal in carica. Ella ha gnü da travuonder tuot ils rimprovers invers il cumün da Scuol, simplamaing perquai ch’ella d’eira fingià illa barcha. Aita Zanetti ha svelt gnü d’imprender, cha dürant il cumbat electoral vegna cumbattü cun tuot ils mezs. 

Las votantas ed ils votants da tuot las fracziuns da Scuol han gnü la pussibiltà d’eleger. Sper la dumonda da müdamaint e cuntinuità, resguardond il möd da politisar, han tuots duos candidats eir gnü ün bun attestat da prestaziuns e cumpetenzas per tour per mans las grondas sfidas chi spettan e per manar inavant il cumün i’l avegnir. Tuots duos candidats vessan gnü bunas qualitats chi vessan fat bain al plü grond cumün da la Svizra. 

Finalmaing es Aita Zanetti gnüda eletta cun ün resultat stupend. Ella ha ragiunt 1068 vuschs pro üna partecipaziun da 58,25 pertschient. Però eir schi nun ha bastü dal tuot, ha Reto Rauch fat cun 836 vuschs ün resultat remarchabel. Quistas vuschs staivan per ün müdamaint politic in cumün e nu saran müttas neir in avegnir. Quai nu das-cha invlidar neir la nouva presidenta cumünala. Sco capo cumünal da Scuol as staja nempe da prüm innan aint il vent ed eir ella sto prochatschar tscherts müdamaints. Esser capo nun es be üna lavur da bell’ora, e da fluors ed aperitivs. 

Il cheu dal capo cumünal es bainschi nouv, quai es ün fat. Ed Aita Zanetti douvra sustegn e fiduzcha per surtour il timun dal cumün. Ella merita la schanza da pudair muossar sia cumpetenza e sias abiltats, sainza gnir bastunada da prüma davent da quels chi laivan ir ün’otra via. Las sfidas per l’avegnir sun vastas. Tantüna voul il cumün far grondas investiziuns ils prossems ons. Perquai esa uossa da’s concentrar süls temas politics e da laschar lavurar a las persunas respunsablas. 

Commentar: Nicolo Bass