La butia da l’Ufficina es darcho turneda i’l ospidel vegl da Samedan (fotografia: Societed Movimento).

La butia da l’Ufficina es darcho turneda i’l ospidel vegl da Samedan (fotografia: Societed Movimento).

Butia da l’Ufficina darcho i’l ospidel vegl

Avaunt trais ans ho la butia da l’Ufficina fat müdeda dal’ospidel vegl illa Chesa Dosch i’l center da la vschinauncha da Samedan. Uossa es quella turneda darcho in sieu lö oriund.

«In settember 2018 vainsa decis da translocher nossa butia a Samedan da l’ospidel vegl illa Chesa Dosch chi’d es da nossa proprieted», disch Andrea Parolini, il mneder da l’administraziun e dal persunel da la societed Movimento (vair chaistina). Il böt d’eira da spargner il fit per las localiteds in l’ospidel vegl, «ma impustüt speraivans d’avair i’l center da Samedan ün po dapü contact culla glieud.» Ch’ün po saja que sto il cas, «pella peja as vaiva diminuieu il contact direct cun noss inquilins cha numnains noss cliaints.»

Vzair cu cha vegn lavuro

Ün dischavantag da la müdeda es sto, scu ch’Andrea Parolini disch, cha l’accumpagnamaint dal cliaint d’eira dvanto ün po pü difficil, «culla butia tuot in üna vouta in chesa». E da l’otra vart manchaiva ün’otra spüerta cha’ls visitaduors da l’Ufficina predschan: «I’l ospidel vegl haun quistas persunas la pussibilted da der ün sguard illas ufficinas, illa tessanda, la falegnamaria e la cuschina», declera’l, «e vzair cu cha vegn lavuro cò. Noss cliaints muossan gugent che chi faun e cu ch’els lavuran.» El manzuna ün ulteriur avantag da turner culla butia i’l ospidel vegl da Samedan.

«Local per ster da cumünaunza»

Il retuorn illas localiteds oriundas da la butia pussibiltescha tenor Andrea Parolini da s-chaffir illa Chesa Dosch ün local da cumünaunza pü grand. «Cò pudainsa manger insembel e fer zieva ils pasts da tuottas sorts gös da cumpagnia.» I’l center Ufficina ho actuelmaing 50 cliaintas e cliaints chi lavuran in üna da las ufficinas u in cuschina. Bgers d’els abitan illa Chesa Dosch: «La granda part deriva da la regiun, nus vains tar nus però eir üna persuna da l’Engiadina Bassa, üna dal Puschlev, üna da la Bergiaglia e duos da la Tumgias-chia.» In lur butia i’l ospidel vegl vendan els textilias, prodots in lain, etuis fats cun blechas e bunteds culinaricas, inclusivamaing differentas sorts da paun.

Text: Flurin Andry/fmr


Noch keine Kommentare