HomePolitikWirtschaftTourismusBildung/SozialesKulturSportBlaulichtGesundheitNatur/Umwelt

Bibi Vaplan sbuorfla d’ideas sainza cunfins ed explodischa sco popcorn in tuot las direcziuns (fotografia: Ida Sgier).

Bibi Vaplan sbuorfla d’ideas sainza cunfins ed explodischa sco popcorn in tuot las direcziuns (fotografia: Ida Sgier).

Üna plattafuorma per creatività artistica

Bianca Mayer para d’avair chattà ün möd da lavurar chi’d es confuorm a las pussibiltats digitalas ed a las pretaisas dal coronavirus. Ella s’ha confruntada cun dumondas fundamentalas ed existenzialas ed ha inventà ün nouv model d’actività chi tilla da la cuntantezza e satisfacziun bsögnaivla.

Bianca Mayer, chantadura ed artista, Scuol/Lumbrein Fingià avant la pandemia dal coronavirus vaiva Bianca Mayer, alias Bibi Vaplan, l’impreschiun cha’l sistem tradiziunal dal marchà da musica nu funcziuna plü. «Adüna darcheu marchantar per arrandschamaints e predschs», quinta la chantadura ed artista oriunda da Scuol. Daspö ch’ella es set ons s’ha’la preschantada regularmaing sün palcs e tribünas, adüna in otras fuormas, minchatant plü svelt e minchatant «Vaplan». Ella s’ha sviluppada in tuot quist ons ad üna persunalità extraordinaria ed ella s’ha etablida illa scena Svizra sco chantadura rumantscha. Regularmaing cumparivan nouvs albums e tuot paraiva in bun uorden. Ed uossa? Il svilup digital ha müdà il cuntegn da consüm e la musica ha ün’otra valur. «Eu vaiva l’impreschiun cha in quist muond digital stessa bain dar daplü pussibiltats sco be adüna registrar discs compacts e dar concerts», disch’la. I’l cheu derasaiva fingià duos trais ons ün’idea tuottafat speciala ed ella ha cumanzà a scriver il scenari d’üna Popcorn-Opera in plüs acts. Intant es rivada la pandemia e tuot es stat salda. Ma na per Bibi Vaplan: Ella s’ha retratta illa chasa da sia nona a Lumbrein ed il coronavirus ha sport üna plattafuorma per esser creativa e lavurar instancabelmaing vi da la visiun. Al principi da november ha Bibi Vaplan preschantà il prolog da la «Popcorn-Opera» chi’d es parti sco üna raketa vers las stailas sainza cunfins. Il prüm act es gnü lantschà culla chanzun «Crazy Popcorn 1» e cull’iniziativa «Extra Life» per prolungar la vita dals duos torins Roccobello e Leon.
Bianca Mayer ha chattà cun sia Popcorn-Opera ün nouv model da creatività ed ün chomp d’actività sainza cunfins e per plüs ons. Uschè chi para ch’ella saja a seis collegas chantauturs ed artists ün pass ouravant. Fingià bod mass’inavant, resguardond il fat, cha eir la Popcorn-Opera viva da l’interactività culs fans e spectactuors. «Eu n’ha stuvü constatar cha ingün nun ha spettà sün mias ideas bluordas. Eu stögl adüna darcheu declerar mia visiun e mias intenziuns», quint’la. E finalmaing eir vender plazzas in sia raketa chi sarà in viadi plüs ons. Ella discuorra da fin desch ons fich cha l’ultim act da quist’opera da popcorn chi explodischa in tuot las direcziuns sarà a fin. «Nus fain pass per pass», disch Bibi Vaplan e declera cha’l proget saja finalmaing eir üna lavur da team. La Popcorn-Opera nu cuntegna be chanzuns, dimpersè eir texts, cudeschs, videos, gös da video, festivals e bler oter plü, simplamaing sco fingià manzunà «ün’explosiun in tuot las direcziuns». La prosma fermativa da la raketa es als 11 marz cun ün mini-festival a Lumbrein. Als 22 avrigl segua üna surpraisa musicala «Minipopcorn 1» ed als 17 mai vain preschantà il prolog dal cudesch: «Baby, kauf mir eine Autowaschanlage!» Als 6 november finischa il prolog da la Popcorn-Opera ed il prossem act po lura cumanzar.
Bianca Mayer para d’avair chattà ün möd da lavurar chi’d es confuorm a las pussibiltats digitalas ed a las pretaisas dal coronavirus. Ella s’ha confruntada cun dumondas fundamentalas ed existenzialas ed ha inventà ün nouv model d’actività chi tilla da la cuntantezza e satisfacziun bsögnaivla. Ad ella nu mancan ils concerts. Anzi, per ella es uossa tuot pussibel ed ella es inspirada e motivada da bandunar ils cunfins tradiziunals. Bibi Vaplan voul intimar a minchün da simplamaing far liber il cheu e d’acceptar sainza temma e panica las pussibiltats cha tuot la situaziun actuala porta cun sai. 

Text: Nicolo Bass


Noch keine Kommentare

1000/1000
  • Pontresina Wochentipp
  • Vorsorgespezialist Generalagentur
  • CUMÜN DA SCUOL
  • TAKE AWAY
  • EDITUR
  • Gesucht im Oberengadin
  • cofox.ch
  • Collavuratur servezzan tecnic (100%)
  • elektro koller
  • 2½- bis 3½-Zimmer
  • Arbeiten in den Bergen
  • Gesucht im Oberengadin
  • ABWARTSSTELLE
  • Privat zu verkaufen
  • Midnight