La redacziun da la «Engadiner Post/Posta Ladina» ha miss quist’eivna priorità sül tema «Esser giuven in Engiadina». Dürant quist’eivna tematica sun gnüts dedichats üna vainchina d’artichels a la giuventüna. Perquai vaina discus in üna sezzüda da redacziun, da vulair dedichar eir la columna da PS a quist tema. Però chi das-cha scriver quella? Üna giuvna? Ün vegl? Eu n’ha ris-chà da m’annunzchar, causa cha sun ün dals pacs suot 50 in redacziun. Che onur! Ma fin cura s’esa insomma giuven? Ed a partir da cura s’esa vegl? In Germania ed in Austria daja para üna ledscha chi definischa chi chi’d es üna persuna giuvna: In Germania s’esa giuven fin pro l’età da 27 ons. In trais regiuns da l’Austria s’esa tenor ledscha be fin 18 ons giuven. Ed in Svizra nu n’haja ris-cha da tscherchar la definiziun. Docter Google manaja, ch’eu saja illa generaziun da sandwich: ne giuven, ne vegl, simplamaing tanteraint. Speresch ferm, cha quel nun as referischa cun «sandwich» sün meis vainter. Tantüna sun eir eu segui a la moda da gegünar cun intervals. Da la saira las 22.00 fin a bunura las 06.00 nu mang e nu baiv eu inguotta ...
Ma quai es ün’otra istorgia. Tuornain dimena darcheu pro’l tema d’esser giuven: Chi d’eira quel furberun chi ha dit, chi’s es uschè giuven sco quai chi’s resainta svess? Quai es be tagnins!? Güst eir ils uffants e l’agen ambiaint fan adüna darcheu tuornar culs peis sün terra e dan da badair chi nu’s es plü 27.
Ma quai es bain listess. Eu sun da l’idea, cha esser giuven es relativ. Giuven s’esa tenor mai fintant chi’s ha amo agens sömmis e böts e fintant chi s’ha la motivaziun da perseguitar quels. E quai adonta cha l’ossa fa mal cun star sü la bunura. Damaja es minchün svess respunsabel per definir, sch’el as sainta giuven o vegl. Ün sandwich nu voul nempe esser definitivamaing ingün.